Deklarasaun Entendimentu Entre Governu Timor-Leste no Parseirus Dezenvolvimentu konabá Programa Kapasitasaun iha área Planeamentu no Jestaun Finanseira

                                                                                                   Iha Mos: Engles ho Bahasa
Dili, 13 Fevereiru 2008  –Banku Mundial  fo’o boas vindas ba asinatura Deklarasaun Entendimentu entre Governu Timor-Leste no Parseirus Dezenvolvimentu konabá Programa Kapasitasaun iha área Planeamentu no Jestaun Finanseira.

“Programa ne’e reprezenta mudansa jenerasional ida iha estratéjia jestaun finansas públikas iha Timor-Leste. Nia define liñas responsabilidade no akontabilidade nebé klaru no los. Ministériu Finansas simu kna’ar atu administra programa ne’e hodi hatama prátika global diak liu nebé iha.” Dehan Sr. Nigel Roberts, Diretor Nasional Banku Mundial nian ba Illas Pasífiku, Papua Nova Giné no Timor-Leste.

Deklarasaun Entendimentu ne’e hari’i mekanizmus ba organizasaun no fiskalizasaun, finansas governu nian. Hein katak programa ne’e sei halais implementasaun no halo transparente liu tan programa dezenvolvimentu governu nian (Governo nia Komunikadu ba Imprensa). Doadores sira kompromete ona ba sira’an rasik atu armoniza sira nia programas ho governu nian.

Ministru Finansas mak sei prezide Komité Supervizaun ida atu monitoriza progresu implementasaun nian no tulun asegura susesu realizasaun objetivus programa nian.

“Ne’e konabá oinsá atu implementa programas empregu, saúde, edukasaun, no uma hela-fatin diak liu tan. Povu Timor-Leste presiza atu hare’e dividendu ida hanesan resultadu ida ba sira-nia funu-naruk ba hetan independensia.” Sr. Roberts dehan.

Banku Mundial rekoñese kompromisu parseirus dezenvolvimentu sira seluk nian nebé aseita dezafiu ida importante teb-tebes hodi harí nasaun nurak ne’e.

Banku louva desizaun Ministériu Finansas nian hodi asina Deklarasaun Entendimentu ne’e iha momentu ida nebé Timor-Leste hasoru no fo atensaun bo’ot teb-tebes ba dezafius seguransa nian iha rai laran. Deklarasaun Entendimentu ne’e nudar indikasaun ida hosi Banku nia apoiu forte ba Povu no Governu Timor-Leste.

“Ha’u pesoalmente, no Banku Mundial nudar organizasaun, hakarak atu Prezidente  José Ramos-Horta rekupera lalais ni-nia saúde tomak. Ne’e sinal bo’ot ida ba komunidade internasional katak maiske iha tempu ida sensitivu tebes nia laran, Governu Timor-Leste la husik nia a’an atu halua-hela-tiha serbisu ida ke todan, maibé importante tebes ba hari’i nasaun.”

Atu hetan Informasaun Komplete Liu tan, Bele Kontaktu:

Stan Grant – Senior Communications Officer World Bank iha Sydney, Australia
Tlp  +61 448 099 101
Email: sgrant@worldbank.org

Ou

Dionisio da Cruz Pereira – Sentro Informasaun Publico Banku Mundial
Dili, Timor-Leste
Ph: +670 7285744
Email: dpereira@worldbank.org