TIRANË, 17 mars 2006 - Zyra e Bankës Botërore në Tiranë shpalli sot 11 finalistët nga Shqipëria për Panairin e Ideve Krijuese të Ballkanit Perëndimor. Tema e këtij programi është krijimi i vendeve të punës, përmes ideve novatore, në sektorin formal. Papunësia është edhe një nga problemet kryesore me të cilat ndeshen vendet e rajonit. Krahas punësimit të të rinjve programi ka në fokus edhe bashkëpunimin ndër-rajonal. 130 kompani private, shoqata biznesi, organizata jofitimprurëse lokale apo ndërkombëtare, institucione lokale dhe qendrore si dhe individë paraqiten projekt-idetë e tyre pranë Zyrës së Bankës Botërore në Tiranë. Shpërndarja gjeografike e projekt-ideve mbulonte të gjitha rrethet e vendit, deri në zonat e largëta. Këto projekt-ide u vlerësuan përgjatë dy fazave nga një juri lokale e përbërë nga 20 ekspertë të pushtetit qendror e lokal, sektorit privat, rretheve akademike, shoqërisë civile, donatorëve, etj. Kriteret kryesore mbi të cilat u gjykuan projekt-idetë e paraqitura janë: novatorizmi, realizmi, qëndrueshmëria, mundësia e replikimit dhe fokusimi tek të rinjtë dhe bashkëpunimi rajonal. Finalistët nga Shqipëria janë si më poshtë: - Grumbullimi, ruajtja dhe përpunimi i plotë i gështenjës së kultivuar në zonën veri-lindore të vendit, “Dardani sh.p.k.”, Tropojë.
- Vetë-punësim për të rinjtë me aftësi të kufizuara, Shoqata Shqiptare e Krijuesve me Aftësi të Kufizuar (SHKAKSH), Tiranë.
- Përgatitja e 60 vajzave në qytetin e Pukës për të qepur faqe këpucësh duke garantuar punësim për to, Fabrika e këpucëve “BERTTONI” sh.p.k. Shkodër.
- Kultivimi dhe rigjenerimi i masiveve të degraduara të bimëve mjekësore dhe aromatike. Organizata: “Mendoni edhe për ne”, Pukë
- Teknologjia e informacionit në ndihmë të punësimit të të rinjve në zonat rurale, Instituti për Kërkime dhe Alternativa Zhvillimi, Tiranë.
- Nxitja e punësimit në Parkun e Butrintit përmes nxitjes së prodhimeve artizanale tradicionale, "Media Saranda” dhe Shoqata “Iliria”, Sarandë.
- Punesim permes tradites, Bashkia e Ersekës dhe individ, Ersekë.
- Rrjeti i punësimit ONLINE. Fondacioni “Mjaft”, Tiranë.
- Ateljeja jonë për punësim e aftësim në Durrës, Shërbimi Social Ndërkombëtar, Zyra për Shqipërinë.
- Një investim në kërkesë – ofertën për burime njerëzore të SME-ve në rrugën drejt konkurrueshmërisë, “Qendra për Edukimin Ekonomik dhe të Biznesit”, Tiranë.
- Përdorimi me efektivitet i burimeve natyrore, burimi kryesor i punësimit dhe sigurimit të të ardhurave në zonat rurale, Fondacioni “Agrinas”, Ersekë.
Dhjetë finalistë nga Shqipëria u përzgjodhën nga juria lokale, ndërsa një finalist u përzgjodh nga ekipi drejtues i zyrave të Bankës Botërore në rajon. Të njëmbëdhjetë finalistët do të marrin pjesë në Panairin Rajonal që do të organizohet në 17-18 maj në Beograd ku bashkë me finalistët nga vendet e tjera të rajonit, gjithsej 55, do të paraqesin projektet e tyre përpara një jurie ndërkombëtare, e cila do të përzgjedhë fituesit për çdo vend. |
RSS