Atu hetan tan informasaun kontaktu: Banku Mundial, Sydney: Elisabeth Mealey +61-2-9235 6551 or 61 (0) 403-443190 Banku Dezenvolvimentu Azia, Manila: Dave Kruger +632-632-5204 DILI, 31 Maiu 2006---Membru komunidade doador internasional sira husu ona ema Timor atu servisu hodi halo ramata krize nebé mosu orasné no tau hikas nasaun ne’e iha dalan dame nian bainhira simu Sr. Ian Martin nebé too iha Dili nudar Enviadu Espesial Nasoens Unidas nian. Governu Austrália, Brazil, Finlándia, Irlanda, Japaun, Nova Zelándia, Noruega, Portugal, Suésia, Reinu Unidu/Inglaterra, Estadus Unidus no Komisaun Europeia, Banku Dezenvolvimentu Azia, Fundu Monetáriu Internasional no Banku Mundial hasai deklarasaun konjunta tuir mai ohin: “Nudar nasaun foun liu mundu nian, Timor-Leste halo ona hakat boot ida iha rekuperasaun hosi destruisaun krize 1999 nian, hodi harí ni-nia ekonomia no hahú funsaun públika ida hosi zero. Buat sira nebé hetan tihaona ne’e, nebé hetan tiha liu hosi esforsu boot povu Timor nian, labele lakon tanba violénsia no konflitu. "Tuir pedidu Timor-Leste nian, Austrália, Malázia, Nova Zelándia no Portugal foo ona resposta lais ida atu restaura seguransa iha Dili. Ami hein katak hahalok ne’e sei hamoris ambiente ida iha-nebé Timor-Leste bele rekupera’an. Nasaun ne’e no ni-nia povu sei iha prospek nabilan ba futuru maibé ema hotu-hotu nebé involvidu orasné tenki kaer metin biban atu halo diálogu iha sira let no ho populasaun tomak atu buka solusaun dame ida. "Ami foo boas-vindas iha Timor-Leste ba Sr. Ian Martin, Enviadu Espesial Sekretáriu Jeral Nasoens Unidas nian Sr. Kofi Annan, atu avalia rasik situasaun no reporta hikas ba Sekretáriu-Jeral. Sr. Martin hatene diak nasaun ne’e liu hosi ni-nia servisu nudar Reprezentante Espesial Sekretáriu-Jeral Nasoens Unidas nian ba Konsulta Popular Timor-Leste no Chefe Misaun ONU nian iha Timor-Leste hosi Maiu ba Novembru 1999.” |
