Refujiadu foin-sa’e ida husu dame no unidade iha ni-nia nasaun

Dili, Timor-Leste, 20 Junho 2006 - “Krizi nebe oras ne’e dadaun mosu iha Timor-Leste laos deit estraga ema katuas, ferik no labarik sira maibe afeta mos aktividade estudante no juventude sira nudar futuru Timor-Leste nian”, dehan joven ida ho otas tinan 19, Ubalda Junior Soares Campos.

Uba nebé hamutuk ho ni-nia familia halai ba sede Banku Mundial iha Dili durante krize ne’e, dehan katak violénsia no konflitu nebé foin lalais ne’e mosu iha kapital hapara tiha atividade hotu-hotu nebé bai-bain nia ho kolega sira halao hanesan aktividade eskola no atividade ekstra-kurikular seluk. Uba nebé orasne’e estuda iha terseiru anu eskola sekundária sente triste tanba nia seidauk bele ba eskola, “Hau la hatene oinsa atu tuir izame hodi ramata hau nia estudu iha eskola sekundária Paulo VI Dili”, nia dehan.

                                                                                                                                                          Uba iha sede BM

Ni amos dehan katak nia so bele husu deit ba Governu atu tau-matan ba sira nia situasaun ne’e, atu nune’e sira bele fila fali ba eskola hodi kontinua sira nia estudus hanesan bai-bain.

Uba nebe uluk iha aktividade barak depois de eskola hanesan, serbisu iha uma, dansa no tuir aktividade iha igreja, dehan “Hau sente stress tebes tamba tenki para hau nia eskola, maibe hau triste liu tanba povo sira nebe la sala buat ida tenki mate (durante konflitu)”.

Uba nebe ho nia familia tomak tenki halai sai husi hela fatin iha Balide tamba ema sivil armadu sira ataka malu. Uluk liu sira evakua ba embaixada Indonesia, ihanebé sira hela durante loron rua. Tanba sira labele hela kleur liu iha iha embaixada, sira muda fali ba sede Banku Mundial tanba sira iha relasaun familia ho membru staff ida. Uba dehan ni-nia familia simu tiha atensaun no apoiu barak hosi nudar ulun boot provizoriu Banku Mundial nian iha Timor-Leste, Sr. Antonio Franco. “Ami laiha problema hahan, aimoruk, be mos no hela fatin tamba ami ho familia tomak hetan tulun barak husi Banku Mundial no embaixada Portugal (nebé fo tiha ap oiu mediku no hanorin).

Labarik sira hetan tratamentu husi doutor Portuguese

Uba dehan nia hein katak ukun nain sira bele tu’ur hamutuk atu establese lalais situasaun diak ida atu ami ho familia sira no refujiadu sira seluk bele fila fali ba sira nia hela fatin. “Hau mos husu ba povo tomak iha Timor-Leste laran tomak, atu labele hirus malu tan, labele uza tan, mai ita hamutuk moris hakmatek atu bele hari’i fali futuru ida diak liu ba Timor-Leste”, nia dehan.